Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> کوئٹہ سانحہ کمیشن:مسئلہ دی جڑ کتھے ہے؟کھپو میڈیا ادھی گل کیوں کر دا ہے؟

کوئٹہ سانحہ کمیشن:مسئلہ دی جڑ کتھے ہے؟کھپو میڈیا ادھی گل کیوں کر دا ہے؟

December 16th, 2016

بلوچستان:کوئٹہ وچ وکیلاں دے ہون والے 8اگست دے حملے بعدوں عدالتاں اک رکنی کمیشن بنایا سی جس تے سپریم کورٹ دی جج قاضی فیض عیسیٰ کم کررہے سن۔ کمیشن دی رپورٹ تے میڈیائی جنگ جاری پر سوال تے ایہہ ہے مسئلہ دی جڑ کتھے؟عدالتی کمیشن نوں بلوچستان بار کونسل دے صدر بلال انور کاسی دے قتل اتے ہسپتال وچ ہون والے وقوعہ دوناں بارے تفتیشاں کرنیاں سن۔ ایس وقوعہ وچ 70توں وادھو بندے مرگئے سن جہناں دی وڈی گنتری وکیلاں دی سی۔ ایہہ کمیشن 56 دناں تیک کم کردا رہیا اتے ایس وچ وڈے وڈے افسراں آپدے بیان ریکارڈ کروائے۔
کمیشن وزارت داخلہ دے صوبائی تے مرکزی محکمیاں بارے اوہو گلاں کیتیاں جہڑیاں اکثر میڈیا وچ وی ہوندیاں نیں اتے افسراں دے ڈرئینگ روماں وچ وی بیان کیتیا جاندیاں نیں ۔کھپو میڈیا ایہہ تے دسے ایس وچ نویں گل کیہڑی ہے؟ وزارت داخلہ نرا ڈاک خانہ ہے یا اک اختیاراں والا ادارہ ایس بارے کس نوں نہیں پتہ۔ کیہہ ساڈی عدالتاں نوں ایس بارے پہلی وار پتہ چلیا ہے۔ جو بیان دتے جاندے نیں اس دا حوالہ ہور ہوندا ہے اتے ریاست یا حکومت نوں ایہہ تاثر دینا ہوندا ہے پئی اساں سب جاندے ہاں۔ جہادیاں نوں کدوں توں ریاست پال رہی ہے ایہہ تے سب جاندے ہی نیں اتے ایہہ اک پالیسی پاروں سی جیہڑی سرد جنگ وچ اساری گئی سی۔
قاضی صاحب توں وادھو کون جاندا ہوئے گا پئی انہاں دے والد پاکستان بناون والیاں وچ رلتی سن۔ ایہہ ریاست کیوں بنائی گئی سی اتے ایتھے کنج پالیسیاں بدلیاں گیاں ایہہ کہانی قاضی ہوری تے جاندے ہی نیں۔ ایس نوں پہلے دن توں کیہڑے خطرے سن۔ ایہناں خطریاں نوں بہانہ بناکے کس پاکستان وچ عوامی راج نہ آون دتا۔ کیوں اساں سرد جنگ دا حصہ بنے۔ فیر جو کجھ افغان جہاد وچ ایتھے ہویا اس وچ تے امریکہ، برطانیہ تے پورا مغربی یورپ اتے اساڈی اشرافیہ سب رلتی سن۔ نیشنل کاؤنٹر ٹیررازم اتھارٹی (Nacta) کیوں کم نہیں کررہیا؟ کون ایس دی اتھارٹیاں نوں منیندا ہے اتے کس نوں ایس بارے اعتراض نیں؟ کیہ ایہہ کوئی لکوئیں گل ہے؟
جو کجھ سیکٹری داخلہ عدالت نوں آکھیا ہے اوہ سب کافی ہے ایہہ سمجھن لئی پئی سوال سیکٹری داخلہ توں وی وڈے نیں۔ ایس توں پہلاں وی جدوں Missing person والا مقدمہ چل رہیا سی تاں وی گل اک تھاں تے جاکے رک گئی سی۔ ایہہ اک وڈا مسئلہ ہے اتے ایس بارے نری وزارت داخلہ کجھ نہیں کرسکدی۔ میڈیا اُتے وزارت نوں رگیدن نال کم نہیں بنے گا۔ میڈیا والے وی ایہہ گلاں بڑے چر توں جاندے نیں۔ مسئلہ ایہو ہے پئی وڈے سر جڑن گے تاں گل اگے ودھے گی۔ نیشنل ایکشن پلان آپدی تھاں اہم پر اس تے عمل کرن لئی وی فیصلے اتلی سطح تے ہون گے۔ پر جدوں ساری قوم، عدالتاں، ادارے پانامہ ڈرامے وچ رجھے رہن گے تاں فیر جیہڑے کم کمیشن دس رہیا ہے،اوہ کس کرنے سن۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels