Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> 60فیصد کراچی والیاں کول سیوریج دی سہولتاں کوئی نہ، ہائے او ربّا

60فیصد کراچی والیاں کول سیوریج دی سہولتاں کوئی نہ، ہائے او ربّا

وچار ڈیسک
December 15th, 2016

کراچی: ضیا دور توں 2008 تک ایم کیوایم کجھ وقفیاں توں علاوہ ہمیشہ کراچی دے تخت تے بیٹھدی رہی ہے۔ کراچی والیاں توں ووٹ لین پاروں ہی ایہہ صوبائی اتے مرکزی پدرتے وی وزارتاں لیندی رہی ہے۔ ڈکٹیٹر کولوں وی انہاں لمیاں رقمان لتیاں سن۔ ایم کیو ایم دے بہوں سارے لیڈر تے ککھ توں لکھ پتی وی ہوگئے نیں پر کراچی دا حال ہورچوڑا ہوچکیا ہے۔ اج دی خبر کراچی واٹر اینڈ سیوریج بورڈ(KWSB) دے حوالہ نال میڈیا وچ آئی ہے۔ لگدا ہے کراچی ول پچھلے 40 ورہیاں توں کسے وی توجہ نہیں دتی۔ ایہہ KWSB اوہی ہے جس وچ ایم کیو ایم آپدے ہزاراں بندیاں نوں وی نوکریاں لے کے دتیاں سن۔ جے پی پی پی اندرون سندھ وچ کجھ نہیں کرسکی یا پی ٹی آئی خیبر پختونخوا دی حالت نہیں بدلی تے ایم کیو ایم کراچی وچ کہیڑے چار چن لا ہے نیں؟ کل اس شہر وچ اک مشاورتی اجلاس ہویا۔ ایہہ اجلاس ورلڈ بینک اتے کے ڈبلیو ایس بی والیاں کروایا سی۔ ایہہ پروگرام اک نویں پرجیکٹ دا حصہ جس دا ناں ’’ریفارمز لئی سرمایہ کاری‘‘ (RLIP) رکھیا ہے۔ ویسے کراچی دے اک پرانے اربن ماہر عارف حسن دا خیال ہے پئی سانوں گند صاف کرن تے صاف پانی جہے نکے کماں لئی فارن ایڈ یا قرضہ نہیں لینا چاہیدا۔ویکھو ہن اوہ بولدے نیں یا نہیں۔
اجلاس وچ دسیا گیا پئی 60 فیصد کراچی والیاں کول سیوریج دی سہولتاں نہیں۔ ایہو نہیں سگوں 50فیصد کراچی والے صاف پانی تک رسائیاں نہیں رکھدے۔بورڈ دے وڈے ڈائریکٹر مصباح الدین فرید ہوراں سارا ملبہ شہر دی بے ہنگم ترقیاں تے پاکے رانجھا راضی کیتا۔ اوہناں ایہہ تے من لتا پئی بورڈ دی بنتر نوں بدلن دی لوڑ ہے پر ایہہ نہیں آکھ سکے پئی ایس گنگا وچ کس کس ہتھ رنگے۔ سیاسی مداخلتاں دی انہاں نندیا کیتی پر افسراں بارے کوئی لفظ نہ بولیا۔ ورلڈ بینک دی پاکستانی پردھان جعفر فریا آکھیا پئی کراچی نوں جیڈے پانی دی لوڑ اس دا نرا 55فیصد ملدا ہے۔ اگلے چار سالاں وچ لوڑ ہور ودھ جاسی۔ پر اوہ ایہہ نہ دس سکے پئی جیہڑا پانی کراچی نوں ملدا ہے اوہ کنج ونڈیا جاندا ہے اتے اس وچ کراچی رہن والے ماڑیاں دا کڈا حصہ ہے تے اشرافیہ کڈا پانی کجھ لیجاندی جے۔
ایہہ وی دسیا پئی بورڈ نوں ہر سال 106ملین ملدا ہے تے ایہہ60ملین ڈالر ہر سال کماندا ہے۔ ساڈے اخبار ملین تے بلین وچ جدوں رقماں لکھدے نیں تے عوام توں گل لکائی جاندی ہے۔ جے اوہ ایہہ لکھن پئی بورڈ نوں ہرسال گیارہ ارب روپیئے ملدے نیں اتے چھ ارب اوہ ٹیکساں راہیں کماندا ہے تے لوکاں نوں وی گل پلے پئے جاندی ہے۔ایس گیارہ ارب وچ کون کون حصہ دار ہے ایہہ اک وکھری کہانی ہے۔ انہاں ایہہ وی دسیا پئی 6ارب دا تے بورڈ دابجلی دا بل ہوندا ہے اتے ایس نیں کراچی الیکٹرک سپلائی دے 30 ارب دینے نیں۔ ہور تے ہور ایس ادارے نے لوکاں کولوں وی 46 ارب لینے نیں۔ ایہہ رقم لوکاں توں لینی ہے یا فیر وڈے وڈے کارخانہ داراں کولوں،ایس دا وی نکھیڑا ہونا لوڑی ہے۔ عالمی پدر تے  ہزار کنکشن تے 2ملازم رکھن دا پیمانہ ہے پر بورڈ وچ ہزار کنکشناں تے ساڑھے چھ ملازم رکھے ہوئے نیں۔ سارے ماہراں دی نظراں لمیری سرمایہ کاری تے ہے پئی ایس نال رشوتاں تے کنسلٹینسیاں وی تے جڑیاں نیں۔ ذرا غور کرو پچھلی سرکار تک ریلوے دا یہو حال سی پر اج پاکستان ریلوے بہتر ہورہی ہے۔ اتھے تے کسی خارجی امداداں وی نہیں لتیاں۔ گل نوں ذرا ہور پکھ نول ویکھن دی لوڑ ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels