Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> چکوال وچ احمدیاں تے حملہ: ایس دے مگر کون؟

چکوال وچ احمدیاں تے حملہ: ایس دے مگر کون؟

December 14th, 2016

چکوال: جو کجھ چکوال شہر توں 35میل دور ’’دُلمیال‘‘ وچ ہویا اس تے عام مسلمان وی حیران تے ریاست وی پریشان پئی جے مقدمہ عدالتاں وچ ہے تاں فیر قنون نوں آپدے ہتھ وچ لین دا ’’طالبانی فیصلہ‘‘ کس کیتا؟ کیہہ مسئلہ نرا اک عبادت گاہ تے قبضہ دا ہے؟ یا ایس مگر کوئی ہور گل جے؟
خبراں موجب پیر نوں ایہہ وقوعہ ہویا جدوں اک ہجوم احمدیاں دی عبادت گاہ ول گئے اتے اوہ ایس عبادت گاہ نوں احمدیاں کولوں واپس لینا چاہندے سن۔ دو بندے مرگئے، اک عبادت گاہ دے حفاظتی دی گولی نال اتے اک عبادت گاہ وچ دم گھٹن نال ،تے زخمی ہون والے وادھو۔ پہلے تے میڈیا وچ دو ترے خبراں چلیاں اتے ایہو لکھیا گیا پئی جنج پلس تے سکیورٹی والے اتھے نہیں سن۔ پر فیر جدوں پنجاب سرکار نے اس دی تردیداں کیتیاں اتے دسیا کہ جے پلس تے سکیورٹی نہ ہوندی تے بہوں خون خرابہ ہونا سی تاں میڈیا تے وی پوری رپورٹنگ ہون لگی۔ میڈیا وچ وی ایس مسئلہ تے کل پروگرام ہوئے اتے عبادت گاہ تے حملہ نوں کسے وی صیح نہیں آکھیا۔ ایہہ اک بدلی ہوئی صورتحال ہے پردو پاسیوں ہون والی رپورٹنگ تے ضیاالحقی رنگ چڑھیا سی۔ ریاست ، میڈیا اتے سیاستدان کسے نے وی قنون ہتھ وچ لین دے حمائیتاں نہیں کیتیاں۔
’’دُلمیال‘‘ وچ دوپاسے ملک برادری رہندی ہے اتے دونویں ڈاڈے وی نیں۔ ایہہ دعویٰ کہ عبادت گاہ 1860دی ہے ہر تھاں رپورٹ ہویا ہے۔ ایہہ گل پکی ہے پئی 1860 وچ ’’احمدی‘‘ نہیں سن کیونجے مرزا غلام احمد ہوراں دے حوالے نال اجہی گلاں 1880بعدوں شروع ہویاں سن۔ اس توں پہلاں تے اوہ مشنریاں تے آریہ سماجیاں نال مناظریاں پاروں مشہور سن۔ انہاں تے ’’الزام‘‘ وی 1880بعدوں لگنے شروع ہوئے۔تھاں کس دی ہے، ایس بارے کوئی اخیری فیصلہ تے عدالتاں ہی نے کرنا ہے۔ایس وقوعہ دی ٹائمنگ دسدی ہے پئی دال وچ کجھ کالا ہے۔
ساڈے ایتھے ’’احمدی مسئلہ‘‘ نوں سیاستاں وچ ورتن دی ریت پرانی ،پئی دو پاسیوں ایس وچ سیاستاں وادھو۔جنھوں یقین نہ ہوئے اوہ ممتاز دولتانے تے خواجہ ناظم الدین دی صوبہ مرکز لڑائی وچوں نکلی 1953دی ’’احمدی مخالف لہر‘‘بارے مڑ جھات مارے، چیتا ہو جا سی۔
خبراں موجب مقدمہ تے درج ہو گیا ہے اتے کجھ گرفتاریاں وی ہویاں نیں۔ البتہ پنڈ وچ حالات تاحال وگڑے ہوئے نیں۔پتہ چلاون دی گل ایڈھی ہے کہ کیہہ اے نرا مقامی مسئلہ ہے؟ یا ایس دے مگر کوئی لکی ہوئی سیاستاں نیں۔ کیہ ایہہ وزیراعظم دے اس حکم دا ردعمل ہے جس پاروں قائد اعظم یونیورسٹی دے فزکس ڈیپارٹمنٹ دے اک شعبہ دا ناں ڈاکٹر عبدالسلام تے رکھیا گیا ہے؟یا کوئی ہور غصّہ جے۔




Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels